4300 sinaturas por un Android en Galego

Ferrol, 27 de xaneiro de 2014

Hoxe queremos compartir convosco un novo chanzo nesta campaña que estamos a levar a cabo para conseguirmos o Android en Galego. Como lembraredes, a finais de novembro tivemos unha primeira reunión con Google na que se nos adiantaba a vontade da compañía por levar a nosa lingua á versión base de Android, aínda que non especificaron datas.

Malia esas relativas boas novas, non quixemos deixar de recoller sinaturas pola causa, xa que consideramos que era necesario seguir a sumar forzas nesta campaña colectiva, algo que foi estendido até as 00.00h de hoxe. En total, sumamos 4294 sinaturas que esta semana enviaremos ás oficinas centrais de Google en Mountain View, a nome de Sundar Pichai.

Porén, con este novo paso non pararemos a nosa actividade; de feito estamos a traballar en novas vías de actuación que, se todo vai como prevemos, seremos quen de compartir en poucas semanas.

Grazas polo voso apoio, seguimos informando.

Primeira xuntanza con Google, avanzando cara o Android en Galego

Madrid, 20 de novembro de 2013

Hai mes e medio puxemos en marcha esta ambiciosa campaña para levar a nosa lingua a todo o ecosistema Android (smartphones, tablets, …). Como temos comentado, na actualidade só uns poucos fabricantes aproveitan os traballos de adaptación do sistema operativo base aos seus trebellos para introducir unha falsa tradución, que non vai máis aló de menús, polo que é preciso a implicación de Google para que a tradución sexa da base do sistema operativo, o que permitiría non só dispór nos nosos smartphones e tablets da opción de galego, senón que ademais facilitaría as cousas á comunidade desenvolvedora de aplicacións á hora de publicar estas na lingua o País.

Como primeiro paso formal, hoxe mantivemos a primeira xuntanza con Google nas súas oficinas locais, onde expuxemos todos os datos que avalan a campaña, os máis destacados:

  • Somos unha comunidade lingüística de máis de 3 millóns de persoas.
  • Somos un pobo implicado coa implantación da nosa lingua nas novas tecnoloxías, como fomos demostrando coas traducións de diferentes ferramentas software e redes sociais ou a presenza na rede (como os recentes éxitos da tradución de Twitter ou o dominio .gal).
  • O galego figura entre as 30 linguas máis empregadas na Internet.
  • Existe o precedente de servizos de Google que xa están dispoñíbeis na nosa lingua (YouTube, Google+, Drive…)

Pola súa banda, desde Google trasladáronnos unha mensaxe de complicidade e compromiso coa adopción do galego nos seus servizos, nomeadamente en Android, e explicáronnos o xeito no que traballan:

Na actualidade hai 60 idiomas prioritarios para eles, é dicir, aos que prestan especial atención e están na axenda de tradución ao lanzar un novo servizo, entre os que está o galego. Deste xeito, cando lanzan calquera produto faise inicialmente en inglés, e logo vai chegando a tradución ao resto deses 60 idiomas nun prazo máis ou menos breve de tempo. É por iso que xa podemos ter na nosa lingua Drive ou Google+, dous dos produtos máis recentes. Porén, os servizos anteriores a esa selección de 60 linguas, van por un proceso máis lento (por exemplo, os casos de Android e Gmail). Pero van. E apuntaron que teríamosnovidades proximamente, aínda que non quixeron concretar nin datas nin servizos afectados.

Así mesmo, confirmáronnos que desde Google España veñen de facer unha solicitude interna ao equipo de Android para que se introduza o galego en próximas versións do sistema operativo. Unha vez máis, sen confirmar datas para que esto sexa atendido ou unha realidade.

Malia estas mensaxes e pinceladas que apuntan ao optimismo, cómpre non acomodarse e seguir a traballar arreo na busca de apoios para ampliarmos esta iniciativa popular e conseguir xa non que esta tradución chegue, que chegará, senón que chegue canto antes. Seguiremos recollendo sinaturas na petición, que enviaremos en xaneiro ás oficinas centrais de Google como complemento á solicitude interna enviada desde Google España.

Aproveitamos para agradecervos todos os apoios recibidos até o de agora. Conseguirémolo! :)

Nace #AndroidEnGalego, unha iniciativa a prol de conseguir Android en Galego

A Coruña, 3 de outubro de 2013

Máis de 3 millóns de persoas empregan o galego. Máis do 90% dos teléfonos intelixentes que se venden no noso País levan o sistema operativo Android. Google aínda non ofrece o noso idioma como opción na base de Android. Algo falla?

Nós cremos que SI.

Por iso vimos de poñer en marcha esta campaña, #AndroidEnGalego, coa que queremos visualizar a necesidade de que Google habilite o Galego como unha opción de idioma máis no sistema operativo base de Android, xa que actualmente queda en mans dos fabricantes a decisión de introducir ou non o galego como opción.

Desde un primeiro momento esta iniciativa, xurdida do blog especializado Mallando no Android, conta co apoio do operador de telecomunicacións galego R Cable, e diversas empresas adicadas ao desenvolvemento de aplicacións móbiles en Galicia, como Smart GalApps, Zadia Software, RedInPut, Mobialia, NeoBitStudio e distribuidores como HardGalicia

 Toda iniciativa centralízase nesta páxina, dividida nos seguintes apartados:

  • O Manifesto: é onde explicamos as razóns que nos levan a poñer en marcha esta campaña, que podedes (e debedes) asinar no Change que enlazamos. O texto será enviado a Google con todas as firmas conseguidas.
  • Que podo facer eu?: aí poñemos diferentes formas de colaborar coa campaña. Sería bo que todo o mundo levase a cabo todas e cada unha delas.
  • Entidades que apoian: listaxe de entidades que a título colectivo apoian a campaña. Se representas a algunha entidade e consideras que deberas estar aí, por favor, fáinolo saber a través da páxina de contacto.
  • Recursos: é un espazo para recoller aplicacións, xogos e outros recusos Android dispoñíbeis na nosa lingua.
  • Contacto: é o lugar desde onde podes contactar connosco.

Entre todas e todos conseguiremos que Google permita por fin dispór de Android na nosa lingua. Contamos contigo?